Сылын аайы Таатта улууһун нэһилиэктэрин икки ардыларыгар нэһилиэнньэ көхтөөх, түмсүүлээх, биир сомоҕо буолуутун ситиһэр сыалтан эргиччи культурнай эстафета ыытыллар. Бу фестиваль уус-уран самодеятельноска, норуот айар айымньытыгар саҥа талааннары арыйыы буолар. Ол курдук оскуола оҕолорун, эдэр ыччаты патриотическай тыыҥҥа иитии, норуот айымньытын бары көрүҥнэрин сайыннарыы, таһымын үрдэтэр сыаллаах тэриллэр. Быйылгы фестиваль уратытынан буолла, үбүлүөйдээх суруйааччыларбыт айымньыларынан испэктээк туруоруу. Биһиги нэһилиэк Алампа Соппуруонап «Кэччэгэй кэриэһэ суох» айымньытын көрдөрдүбүт. Туруорууну биир дойдулаахпыт, суруйааччы Петр Самсонов — Бүөтүр Хара туруорда. Маны таһынан хор, хомус, чабырҕах, дьиэ кэргэн толоруута, араас дойду үҥкүүтэ, сонунтан сонун номердар тахсан истилэр. Академическай концерт таһынан, сонун көрүҥ, геобрендинг, ол эбэтэр дойдубутун эргиччи көрдөрөр кылгас кээмэйдээх видео уһуллубута буолла. «Ыалдьытымсах саха ыалан сандалыта» диэн саха аһын тупсаҕайдык тардан ууруу, өбүгэ аһын сөргүтүү олукка, нэһилиэк Далбардара бары да кэриэтэ кыттыыны ыллылар. Бу фестиваль, чахчы дьону-сэргэни олус түмэн, сомоҕолоон, биир бэртээхэй биһирэм күн ааста.