Сааскы салгын илгийэн,
Уйулҕаҕар сипсийэн
Иэйии аанын сэгэттэ,
Сүрэхтэрдиин кэпсэттэ.

Күммүт сыыйа ылааран,
Сардаҥатын утааран
Үөрүү кыымын ыһыахтыыр,
Кууспаҕалаан ылбахтыыр.

Мэник тыалбыт дьэргэйэн,
Сүүрэ-көтө сэгэйэн
Куту-сүрү сөргүтэр,
Өрө дайа көтүтэр.

Таммах сэмээр уһуктан,
Нарыламмыт чопчуттан
Нарын дорҕоон ыыталыыр,
Эрэл кыымын ыспахтыыр.

Эти-сиини илбийэн,
Ыралары бэрийэн
Сааспыт илэ турунна,
Кутаа уотун отунна.

Муус устар 11 күнүгэр «Аллан» норуот айымньытын дьиэтэ сылын аайы ыытар «Дорообо, сандал саас» — тэрилтэлэр, холбоһук хамаандалар икки ардыларыгар ыытыллар күрэхтэрэ буолан ааста. Ону таһынан биирдиилээн бастыыр иһин «Валенки шоу» уонна «Бой петушков» буолла. Бу күн халлаан ып ыраас, сып-сылаас, күн көмүс кыымынан ыһыахтанан, балачча балысхан ириэрии буолла. Быйылгы тэрээһиҥҥэ ох курдук оҥостон орто оскуола үлэһиттэрин хамаандата, оскуола үөрэнээччилэрин хамаандата уонна холбоһук «Веснушки» диэн хамаандалар күөн күрэстэстилэр. Оригинальный музыкальнай номер диэн түһүмэхпитигэр ырыа да иһиттибит, оҕолор сандал саас кэрэтин туһунан хоһоон аахтылар. “#Весне дорогу” – фотозона күрэҕэр сүрдээх үчүгэйкээн ;лэлэр турдулар. Олохтоох библиотека үлэһитэ Ульяна Ивановна көрдөөх, күчүмэҕэй ыйытыктара, уонна ыһыылаах-хаһыылаах эстафета ыытылынна. Түмүккэ, орто оскуола үлэһиттэрин «Дружба» хамаандата бастакы миэстэни ылан харчынан бириэмийэлэннилэр. Итини сэргэ хаатыҥка быраҕыытыгар физкультура учуутала Виктория Сарычева тэҥнээҕин булбата, онтон бөтүүктэр киирсиилэригэр оскуола 9 кылааһын үөрэнээччитэ Алик Старостин бастыҥынан буолла. Итини сэргэ атыы-тутуу дьаарбаҥкатын оскуола 7-с кылааһын кыргыттара тэрийэн киэргэттилэр. Кэлбит ыалдьыттар илии тутуурдаах, өттүк харалаах тарҕастылар.