Бүгүн биһиги нэһилиэккэ Россияҕа Норуоттар Сомоҕолоһууларын, Саха сиригэр Культура, Таатта улууһугар Айар Ситим сылларын аһыллыытын үөрүүлээх тэрээһинэ буолан ааста. Бу киэһэ араас норуоттар быыстапкалара турда, саҥа сыл алгыһа этилиннэ, нэһилиэкпитигэр олорор араас омук бэйэтин норуотун сырдатан «Единство народов России» конкурс тэрилиннэ. Бу ыытыллыбыт күрэххэ быйыл Алтай Республикатыттан физкультура учууталынан үлэлии кэлбит Виктория Евгеньевна Сарычева, Тыва Республикатыттан омук тылын учууталынан үлэлиир Хактыг — Оол Чойгаана Демьяновна, күннээх Казахстаҥҥа күн сирин көрбүт, оскуола социальнай педагога Аида Куатбековна Копбаева, юкагир хааннаах нэһилиэкпит Герой Ийэтэ Ефросинья Александровна Винокурова, олоҥхо дойдута Сунтаартан кэрэ кийииппит Вилена Владимировна Иванова кыттыыны ыллылар, кэрэ киэһэбитин киэргэттилэр. Түөрт түһүмэхтээх күрэххэ кыттааччыларбыт бэйэлэрин норуоттарын, омуктарын туһунан сырдаттылар, эргиччи арыйдылар. Бу киэһэни тэрийсибит дьоммутугар-сэргэбитигэр махталбытын тиэрдэбит. Үүммүт сыл соруктарын бары бииргэ сиэттиспитинэн ситэрсиэх диэн ыҥырабыт👏🏻👏🏻👏🏻