Олунньу 13 күнэ — Төрөөбүт тыл уонна сурук-бичик күнэ.

Саха Сирин бастакы Президена М.Е. Николаев 1996 сыл олунньу 9 күнүнээҕи 1294 №-дээх «Төрөөбүт тыл уонна сурук-бичик күнүн биллэрии туһунан» Ыйааҕыгар олоҕуран, Семен Андреевич Новгородов төрөөбүт күнэ — олунньу 13 күнэ — Төрөөбүт тыл уонна сурук-бичик күнүнэн биллэриллибитэ. Бу Күн олохтонуута Саха Сирин төрүт олохтоохторун төрөөбүт тылларын сайыннарыыга, бастакы саха суругун-бичигин олохтообут саха лингвист-учуонайа, бастакы саха үөрэҕин кинигэлэрин таһаарааччы Семен Андреевич Новгородов сырдык кэриэһин үйэтитэр, аатын ытыктатар соруктаах. Бу Күн араас үөрэх кыһаларыгар, культура кииннэригэр төрөөбүт тылга аналлаах араас тэрээһиннэр ыытыллаллар. Оскуолаларга Саха суруйаачыларын, поэттарын кытта көрсуhуулэр ыытыллаллар, араас күрэхтэр, көрүүлэр тэриллэллэр. Республика үрдунэн саха тылыгар анаммыт араас тэрээһиннэр, көрсүhүүлэр киэҥ хабааннаахтык ыытыллаллар.  Биһиги нэһилиэкпитигэр нэдиэлэ устата араас хабааннаах тэрээһиннэр ыытылыннылар. Олунньу 12 күнүгэр «Сахам сайдам тылынан» диэн өй оонньуута ыыттыбыт. Оонньууга детсад, оскуола, олохтоох дьаһалта уонна бэтэрээн Сэбиэтэ буолан хамаандаларынан күөн көрүстүлэр.  Хамаандалар синонимнары, антонимнары, бэргэн этиилэри, өс хоһооннору таайдылар, тэттик ыйытарга эппиэттээтилэр, саха алфавитын хатылаатылар уонна оонньуубутун аатынан бэргэн этиилэри толкуйдаатылар. Ол курдук биэс түһүмэх түмүгүнэн детсад коллектива кыайыылаах үрдүк аатын ылла. Кыайыылаахтары эҕэрдэлиибит, бары кыттааччыларга инникитин ситиһиилэри баҕарабыт!Олунньу 14 күнүгэр, төрөппүт-оҕотунаан «Саха тыла. Саха ыала. Саха тыына» күрэх олус үчүгэйдик ыытылынна. Кылаан кыайыылаах Коля Матаннанов ийэтэ Наталья Мировналыын. 1 Үктэл Арина, Ираида Егоровна Новгородовтар, 2 үктэл Егор, Саргылана Егоровна Крыловтар, 3 үктэл Арсен, Александра Григорьевна Мигалкиннар. Сахалыы саҥа сатараатын, саха омук сайыннын!