«Сэтинньи 12 күнүгэр Таатта улууһун Гаврил Васильевич Егоров аатынан Хара-Алдан орто оскуолатыгар Саха АССР оскуолаларын үтүөлээх учуутала, РСФСР норуотун үөрэҕириитин туйгуна, Таатта улууһун Бочуоттаах олохтооҕо, үлэ, тыыл ветерана Александра Гаврильевна Захарова 100 сылыгар аналлаах кылаастарынан презентационнай сырдатыы үлэ ыытылынна. Александра Гаврильевна учуутал, наставник, директор, общественнай үлэһит, лектор, сельсовет председателэ, ийэ, эбэ быһыытынан элбэх өрүттээх олоҕун кэрчиктэрэ сырдатылынна. Оҕолор, кылаас салайааччылара, төрөппүттэр кыһанан үлэлээбиттэр. Бу күн ветеран учууталларбыт Захарова Варвара Дмитриевна, Захарова Варвара Ивановна Александра Гаврильевнаны кытта алтыспыт кэмнэрин ахтан, санаан аастылар. Презентациянан сырдатыыга бастыҥ үлэнэн 1-2 кылаас холбоһуктаах үлэтэ буолла. Кинилэр А.Г. Захарова төрөөбүт сирэ-дойдута диэн үлэни оҥордулар. Кырачаан оҕолор төрөппүттэрин, учууталларын кытта өтөхтөрүнэн сылдьан олус дириҥ ис хоһоонноох үлэни оҥорбуттар. Кинилэргэ Александра Гаврильевна кыыһа Татьяна Захарова, сиэнэ Василий Горохов туруорбут анал бириэмийэлэрэ тигистэ. Оҕолор кэпсииллэрэ даҕаны лоп-бааччы, киһиэхэ тиийимтиэ. Кылаас үөрэнээччилэригэр Александра Гаврильевна кыыһа Татьяна Николаевна, сиэнэ Василий Горохов, балтылара Анна Захарова, Мотрена, Наталья, Лира, Екатерина Винркуровалар, олохтоох дьаһалта баһылыга Дьулустан Алексеевич Старостин, 1959-1960 сс. алын сүһүөххэ үөрэммит оҕолор, 1962-1970 сс. выпуск кылааһын оҕолоро харчынан бириэмийэ олохтоотулар. Тэрээһиҥҥэ кыттыспыт бары дьоммутугар барҕа махтал тылларын этэбит. Үйэтитии — кэнчээри ыччат уруккуну билэрин ситиһии буоларын өйдүүбүт». Директоры иитэр үлэҕэ солбуйааччы Оксана Петровна Егорова тэрээһин туһунан иһитиннэриитэ.

Кэлэр кэнчээри ыччаттарбытыгар инникитин да үйэлээҕи үксэтэ, дьоһуннааҕынан дьарыктана, саҥаны-сонуну айа-тута сылдьалларын баҕарыаҕын!