Сэтинньи 1 күнүгэр «Аллан» норуот айымньытын дьиэтигэр оскуола үөрэнээччилэрэ, түмсүүлэр, үлэ коллективтара кыттыылаах концерт буолан ааста. Бырааһынньыктааҕы киэһэни быйыл Тува Республикатыттан кэлбит, омук тылын учуутала Чойгаана Демьяновна уонна информатика учуутала Сергей Александрович иилээн-саҕалаан ыыттылар. Бу киэһэ сахалар, эбээннэр, нууччалар, авардар, еврейдэр, армяннар үҥкүүлэрин сөҕө көрдүбүт. Оскуола учууталлара тува уонна нуучча тылынан олус ис киирбэх ырыаны ыллаатылар, Татьяна Новгородова «Седая ночь» ырыаны хакас тылынан толордо, оскуола кырачаан кыргыттара, үрдүкү кылаас кыргыттара нууччалыы ырыанан киэргэттилэр, Чуумпу Кытыл түмсүү «Аан дойду ыччатын сүрэҕэ» ырыанан ньиргитэн кэбистэ. Онтон, дьэ хомус уонна таҥсык доҕуһуоллаах орто оскуола эр дьонун коллектива «Саха буоларгынан киэн тутун хоһоону» биир тыынынан аахтылар. Былатыан Ойуунускай «Харахтанаары кэлбиттэр» кэпсээниттэн монолу быһа тардан убайбыт Бүөтүр Хара чахчы да оруолугар киирэн ааҕан сөхтөрдө. Чуумпу Кытыл түмсүү олус көрдөөх сценката залга олорор дьону бэртээхэйдик күллэрдэ. Румын, саха, нуучча тылынан Алла Пугачева «Миллион алых роз» ырыатын трио толоруутугар иһиттибит. Библиотекарь Ульяна Ивановна «Один из двух» диэн оонньуута көрөөччүлэри барыларын хапта. Уонна концерт түмүктүүр түһүмэҕэ «Доҕордоһуу ырыата» бары кыттааччылары хабан куолаан толоруутунан түмүктэннэ. Бары нэһилиэкпит олохтоохторугар баҕарабыт доҕордоһууну, сомоҕолоһууну уонна эйэлээх буолууну!