Эдэрбит син биир эргийбэт

Буудура кырааска да быыһаабат,

Ол онно айманан туһа суох

Олох диэн ол оннук буоллаҕа…

Сиэркилэ буруйун көрбөппүн

Кырдьыгы кэпсиирин билбэппин

Баҕардар быраҕан да ыытыахха

Эдэргэ түһэрбит биллибэт…

Ытана олоруох кэриэтин

Ыл тахсан салгыҥҥа күүлэйдиэх

Тымныыга дьыбарга эрчиллэн

Доруобай сылдьарга дьулуһуох

Баҕардар сирэйбит мыччыстан

Сааспыт кэлбитин кэпсээтин

Туох буолуой, кэлиэхтээх кэлбитэ

Дьоллоохтор кырдьары көрсөллөр…

Этэҥҥэ сиэннэри көрсөммүт

Кылыйа сылдьыаҕыҥ кыргыттаар

Санааҕыт түспэтин кыраттан

Олохпут салҕанар сиэннэргэ…

Кырдьар сааhы кѳмүс күhүҥҥэ, айылҕа ото-маhа хагдарыйар кэмигэр, тэҥнииллэр. Ол иhин бырааhынньык эмиэ бу кэмҥэ ыытыллар. Сыала — аҕам саастаах дьон олоххо кѳрсѳр ыарахаттарыгар болҕомтону ууруу. Символа — арыллыбыт ытыс — үтүѳ санааны уонна кѳмѳнү-ѳйѳбүлү кѳрдѳрѳр. 2025 сылга планета үрдүнэн 60 саастарын туолбут 1,2 млрд киhи баар буолуо диэн этэллэр. Оттон Арассыыйаҕа билигин аҕа саастаах кѳлүѳнэ нэhилиэнньэ уопсай ахсаанын 20-тэн тахса бырыhыанын ылар. Аҕа кѳлүѳнэ үтүѳ олоҕун хааччыйыы дойду, ѳрѳспүүбүлүкэ биир инники турар соругунан буолар. «Аллан» норуот айымньытын дьиэтигэр аҕам саастаахтар күннэригэр анаан «Аптаах чүмэчи» — библиотекарь У.И. Никулина чүэчи оҥоруутугар маастар кылааһыттан саҕаланна. Ол кэннэ араас хабааннаах оонньуулар тэриллэн ыытылыннылар. Кэлбит ыалдьыттар маанылаах остуол тула түмсэн олорон уруккуну-хойуккуну, буола турар үтүө да, мөкү да сонуннары кэпсэтэн сэргэхсийдилэр. Хас биирдии аҕам саастаах ыалдьыппыт сэмэй бэлэхтээх үөрэк-көтөн тарҕастылар.